ଶଙ୍କେରେଶ୍ୱର ମହାଦେବଙ୍କ ପୀଠରେ ବିଶ୍ଵଶାନ୍ତି ମହାଯଜ୍ଞ
କାକଟପୁର ତା 21/1 ପୁରୀଜିଲ୍ଳା କାକଟପୁର ବ୍ଲକ ଅଧିନସ୍ଥ ସୁହାଣପୁର ଗ୍ରାମପଞ୍ଚାୟତ ଫଣଫଣା ଗ୍ରାମରେ ଥିବା ଷୋଡ଼ଶ ଶତାବ୍ଦୀରେ ନିର୍ମିତ ବାବା ଶଙ୍କେରେଶ୍ୱର ମହାଦେବ ପୀଠରେ ବିଶ୍ୱ କଲ୍ୟାଣଅର୍ଥେ 4 ଦିନ ଧରି ଅନୁଷ୍ଠିତ ହୋଇଥିବା ବିଶ୍ୱଶାନ୍ତି ମହାଯଜ୍ଞର ପୂର୍ଣ୍ଣାହୂତି, ଶୁକ୍ରବାର ଦିନ ଦିଆଯାଇଛି l ଅଧିବାସ ଦିନ ସକାଳୁ ମନ୍ଦିର ପହଡ଼ ଖୋଲିବା ପରେ ଶଙ୍କେରେଶ୍ୱର ମହାଦେବଙ୍କୁ ମହାସ୍ନାନ କରାଯିବା ପରେ ମଙ୍ଗଳଆଳତୀ, ସୂର୍ଯ୍ୟ ପୂଜା, ପାର୍ଶ୍ଵଦେବତା ପୂଜା , ସର୍ବ ଦେବାଦେବୀଙ୍କୁ ଆବାହନ ପରେ ମହାଦେବଙ୍କ ରୁଦ୍ରାଭିଷେକ ହୋଇଥିଲା l ପୂର୍ଣ୍ଣ୍ୟତୋୟା ପ୍ରାଚୀ ନଦୀ ନିକଟରେ ଥିବା ରୋହଣାକୁଣ୍ଡ ମଠ ନିକଟରୁ 108 ଟି ଜଳପୂର୍ଣ୍ଣ କଳସ ଶୋଭାଯାତ୍ରାରେ ନିଆଯାଇ ଯଜ୍ଞ ବେଦୀ ନିକଟରେ ସ୍ଥାପନ କରାଯିବା ପରେ ବୈଦିକ ବ୍ରାହ୍ମଣ ମାନଙ୍କ ଦ୍ଵାରା ଯଜ୍ଞ କାର୍ଯ୍ୟର ଶୁଭାରମ୍ଭ ହୋଇଥିଲା l
ଯଜ୍ଞରେ କର୍ତ୍ତା କର୍ତ୍ତୀ ଭାବେ ରମେଶ ଚନ୍ଦ୍ର ପଣ୍ଡା ଓ ବିଷ୍ଣୁ ପ୍ରିୟା ପଣ୍ଡା 1008 ଥର ଘୃତ ପ୍ରଦାନ କରିଵା ପରେ ଯଜ୍ଞର ପୂର୍ଣ୍ଣାହୂତି ଦିଆଯାଇଥିଲା l ମନ୍ଦିର ବେଢାରେ ଥିବା ମା ତେନ୍ତୁଳି ଦେବୀଙ୍କ ନିକଟରେ ଗୀତା ଯଜ୍ଞ ସାଙ୍ଗକୁ ଚଣ୍ଡୀ ପାଠ , ଶଙ୍କେରେଶ୍ୱର ମହାଦେବଙ୍କ ନିକଟରେ ଅଖଣ୍ଡ ନାମ ସଂକୀର୍ତ୍ତନ ଓ ରାତ୍ରରେ ପ୍ରବଚନ , ଭଜନ ସମାରୋହ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା l ଏହି ଧାର୍ମିକ ପୀଠକୁ ସୁହାଣପୁର , ଆମପଡା , ବାଲିଉପର , ରାଏସ ଆଦି ଗାଁ ସମେତ ଆଖ ପାଖ ଗ୍ରାମର ଲୋକମାନଙ୍କ 4 ଦିନ ବ୍ୟାପୀ ଭିଡ଼ ଜମିଥିଲା l ଶଙ୍କେରେଶ୍ୱର ଧାର୍ମିକ ଓ ଦାତବ୍ୟ ଟ୍ରଷ୍ଟର ପ୍ରତିଷ୍ଠାତା ସଦସ୍ୟା ମିନତୀ ପଣ୍ଡା , ପରିଚାଳନା ଟ୍ରଷ୍ଟି ପ୍ରଫେସର ରାଧାଶ୍ୟାମ ପଣ୍ଡା ନିଷ୍ଠାର ସହ ଏହି କାର୍ଯ୍ୟକ୍ରମକୁ ପରିଚାଳନା କରିଥିଲେ l
